27. mai, 2019

Ein uforutsett, brå sving på livsvegen

For ni dagar sidan var eg spent og glad. Eg var motivert og klar. Spent, glad, motivert og klar til rehabiliteringsopphald på Haugland Rehabiliteringssenter. Brevet som kunne fortelje meg at eg hadde fått tildelt tre veker frå 22. mai, kom i februar. Eg vart glad over å ha fått plass, og i løpet av månadane med ventetid, vart eg meir og meir motivert til å få komme dit og få hjelp med å komme i gang med tiltak som kan gje meg ein betre kvardag med dei helseutfordringane eg har.

Slik vart det ikkje. Eg møtte ein uforutsett, brå sving på livsvegen. Berre få dagar før avreise fekk eg akutte magsmerter, som viste seg å vere ein kraftig og stygg galleblærebetennelse. Onsdag 22. mai, dagen då eg eigentleg skulle reise til rehabiliteringssenteret, var eg i staden innlagt på sjukehus, og måtte på operasjonsbordet for å fjerne galleblæra. Eg hadde ekstremt høg CRP. På operasjonsdagen var den oppe i 485. Så eg fulgte sjølvsagt legen si anbefaling om operasjon.

Så i staden for opphald på Haugland Rehabiliteringssenter, brukar eg no dagane til å komme til hektene igjen, både etter den belastninga kroppen vart utsatt for grunna høg CRP og kraftige smerter, og etter inngrepet.

Heldigvis mista eg ikkje plassen på rehabiliteringssenteret. Eg fekk ei utsetjing og vil få eit nytt opphald på tre veker, forhåpentleg i løpet av sommaren/hausten. Det er eg takksam og glad for. Muligheten for hjelp til å komme i gang med tiltak for betre mestring av helseutfordringane mine ligg der og ventar på meg. Ein uforutsett, brå sving på livsvegen har gitt meg ein omveg. Men eg tek omvegen steg for steg, og snart er eg tilbake på rett spor, i riktig retning.

*****************************************************************************************************